هو لية المتفوق فى الثانوية بيفشل فى الجامعة

انا مش فاهم حاجة خالص من التفاضل و التكامل
مع انى الواحد كان فى الثانوية جايب 91 و اللهى و جة فى الجامعة مش عارف اية الى حصل ممكن اعرف لية

مين قال كده بس، أحيانا في ناس بتكون مش متميزة في الثانوية العامة، لكن لما يدخلوا الجامعة بيتميزوا في مجال دراستهم، وكمان اللي يخليك تجيب 91% في الثانويةالعامة كابوس الشعب المصري مش هتعرف تجيب تقدير في اكتر كلية في مصر ممكن تجيب فيها تقدير بكل سهولة، المشكلة الوحيدة هي الجو العام، انت في الثانوية العامة البيت كان عامل طوارئ، وكل الناس بيقولولك شد حيلك يا محمد، بالتوفيق يا محمد البلد مستنياك يا محمد، بالاضافة الى انك كنت بتاخد دروس في كل المواد، يعني استاذ بيتابعك مرتين في الاسبوع على الأقل وبيعملك امتحان كل شهر وكل الكلام ده كان لازم يخليك تجيب 91% حتى لو مكنتش فاهم حاجة، الجامعة بقى غير ودي الغلطة اللي بيقع فيها نسبة كبيرة من الطلبة، انت بتدخل الجامعة الرقيب عليك هو نفسك ثم نفسك ثم نفسك، مفيش حضور وغياب، مفيش واجب، مفيش امتحانات شهر، الضغط اللي كانت العيلة عاملاه عليك اتفك، يعني انت بتبدأ دراسة في شهر 9 مفيش أي ضغط عليك إلا على شهر 12، تقوم تبتدب تشد حيلك واللي المفروض يتفهم في 3 شهور انت عايز تفهمه في شهر، انا مبسدش نفسك ولا بحبطك، بس حبيت أشرح النظرية دي، نرجع بقى لموضوع التفاضل والتكامل، أولا التفاضل والتكامل في الرياضة البحتة مفيش أسهل منها، هي بتيجي في الامتحان مباشرة جدا ومافيهاش أي لعب، عايزة بس تكون حافظ القوانين وعارف المسألة محتاجة أنهي قانون، فكرة حلوة كنت بعملها ولحد دلوقتي اني بكتب قوانين كل فصل في ورقة وأحفظها جامد، وبعدين اجيب مسائل كل فصل واحل تمارينها وبالحل القوانين هتتحفظ، طبعا انت امتحانك بعد بكرة يعني لازم تضغط على نفسك شوية وان شاء الله نسمع انك جبت تقدير في الرياضة، وفي باقي المواد، انت بس استعن بالله وان شاء الله ربنا هيعينك، معلش طولت عليك شوية، بس عادي كله بثوابه

شكرا يا كوتش
انا ما اتعرفتش بيك

اخوك مازن، الفرقة الرابعة ادارة أعمال،