اللهم ابعد المراقبين عنى وقرب ورقة زملائى منى واجعلنى انقل بتأنى

انا مش عارف انا مستهدف فى كل الامتحانات فى امتحان المحاسبة اللى انا مذاكرها من اول السنة محلتش فيها حاجة مش مهم نعوض فى السلوكية وفجأة حدوث حالة من الاحباط البشعة مش هذاكر سلوكية يعنى المادة اللى انا مذاكرها من اول السنة محلتش فيها حاجة والسلوكية اللى انا معرفش فيها غير اسمها هم اليومين دول اللى هخلونى انجح المهم قبل الامتحان بساعات مقدرتش مذاكرش قرأت الملزمة ودخلت الامتحان ويا على الندم الامتحان بالنص من الملزمة بس انا كل اللى انا عرفوه انى شفت الاسئلة دى المهم وانا قاعد بألف فى حالى على اساس اللى انا معرفوش صحبي اللى ورايا هيساعدنى وعمال اكتب وفجأة المراقب ساب كل اللجنة وقالى تعالى وقعدنى بعيد خالص عنهم ليه مش عارف وشايف كله عمال يغش من كله وانا بتحصر على نفسى اما فى امتحان الرياضة اول نقطة كانت المعادلة وانا بحلها كنت بفكر فى النقطة الثانية التوازن وطلعت الناتج فى دماغى خلصت المعادلة ودخلت على التوازن معرفتش اكتب فيه حاجة وهكذا فى باقى الامتحان الورقة الاولى وعلى وما أظن انى انا نسيت كل الرياضة تماما وزاد الطينة بلة التختة بايظة وعمالة تقع كل شوية وترتنى اكتر منا متوتر والحمد لله افتكرت الرياضة وكملت باقى الاسئلة وفى الوقت ده قعدت ادعى على اللى كانوا بيقولوا انى وقت الامتحانات مش بيكفى وكان عدى من الوقت ساعة وجهزت نفسي على الرحيل وجاى بطبق الورقة اكتشفت انى الورقة ليها ظهر وساعتها جالى احساس محستهوش قبل كده مش نسيت الرياضة انا نسيت اسمى كمان والمشكلة انى دى المادة الوحيدة اللى انا ضامن فيها الامتياز ده لو في حاجة اكبر من الامتياز كنت هجبها مش عارف ايه اللى حصل ده وفى امتحان الادارة مش عارف فيها غير تلتها بس والباقى معرفوش تماما دخلت الامتحان كل ما اشوف سؤال بفتكر الصفحة بتاعته فى الملزمة ومكانه بالظبط ومعرفش اجابته وفى الاخر جوبت على كل الاسئلة اللى انا معرفش حاجة فيها صح والباقى اللى انا عرفوه جوبته غلط انا كنت عايز حد يقولى اول كلمة بس في كل سؤال وانا هكمل وحاولت بس الورقة كانت هتسحب منى واتعزلت حبس انفرادى تانى مرة وساعتها افتكرت ان لكل مجتهد نصيب وانا اجتهد فى الدعاء علشان كده خت نصيبى وخرجت من الامتحان احمد ربنا انى انا مذاكرتش غير تلت المنهج بس وقولت ياريت مكنت ذاكرت خالص معلش طولت عليكم بس انا كان نفسي افضفض شوية ومش لاقى حد افضفض معاه عقبال الاقتصاد واللغة انشاء الله وشكراااااااااااااااا

[center]خلاص امتحان المحاسبة والسلوكية والرياضة والادارة خلصو خلاص اهتم بالاقتصاد واللغة وسيب الباقى على ربنا

شفت يا ميدو ، كل ده عشان كنت عايز تغش من زميلك، ليه كده يا بابا، كده مش كويس عشانك
موضوع انك لما تشوف السؤال بتفتكر انك شفته قبل كده بس مش عارف تكتب فيه حاجة كان بيحصل معايا كتير، بس يللا مش مهم، ربنا يوفقك بإذن الله وتبطل تغش وتنجح

انا مكنتش عايز اغش انت تعرف عنى كده انا كنت عايز حد يفكرنى باول كلمة فقط فى الاسئلة اللى انا مش فكرها وانا هكرها

حرام عليك انا عمرى مغشيت ومبعرفش اغش خالص يوم ما افكر بتمنع

انا مكنتش عايز اغش انت تعرف عنى كده انا كنت عايز حد يفكرنى باول كلمة فقط فى الاسئلة اللى انا مش فكرها وانا هكرها

ده بيرجع لحاجه واحده بس اننا لما بنيجي نذاكر مش بنفهم احنا بنحفظ فمجرد غياب كلمه واحده مننا ممكن تعمل اعاقه كبيره جدا عند الاجابه

لاكن لو فهمننا هنعرف نجاوب حتي لو قزلنا معني مشابه ليها هتتحسب صح



انما رأيي في انك عاوز تشوف ولو كلمه واحده وتبقي تكمل لوحدي انا هقوللك رأيي المتواضع لاكن بدون زعل دي انا بعتبرها خش والرسول قال من غشنا فليس مننا

ده رأيي المتواضع ومعذرة اختلاف الرأي لا يفسد للود قضيه



سبحان الله من يتق ويصبر يجعل له من كل ضيق مخرجا ويرزقه من حيث لا يحتسب

انت بس ذاكر وتوكل علي الله ومتنويش الغش وسبحان الله ربنا بأشاره واحده يبدل من حال الي حال يعني لو اتقيت الله وقررت انك متغشش ربنا هييسرللك حالك وتلاقي نفسك بتجاوب علي حجات انت مش عارف جاوبتها ازاي


ربنا ينجحنا جميعا يارب

من غشنا فليس منا هوده مبدأي بس انا شايف كل اللى اللجنة بتغش ماعدا انا مش بعرف الطرق العلمية الحديثة للغش اكتشفت ان فى ناس بتكتب على المناديل وانا مش كنت عايز اغش ومش بحط فى دماغى الغش خالص علشان كده بروح فى داهية وعلى الفهم سهل جدا بس الادارة على ما اعتقد مفهاش كلام كتير فهم معظمها بل كلها يعتبر حفظ وانا مش بعرف احفظ

ما هو مينفعش اننا نعمل الغلط عشان كل اللي حولينا بيعملوا الغلط

للأسف احنا بنبص لنص الكوبايه الفاضي

احنا منعملشالغلط لمجرد ان اللي حولينا بيعملوا غلط طيب اذا كان مبدأ حضرتك هو من غشنا فليس مننا وده كلام الرسول صلي الله عليه وسلم اللي هو مثلنا الأعلي اللي لو مفروض هنقتدي بحد يبقي هو وبس

وبعدين لو هما المراقب مش بيشوفهم يبقي ربنا شايفهم

عاوزين ناخد شهاده بالحلال عشان لو اشتغلنا بالشهاده دي يبقي فلوسنا حلال


ولا ايه رأيك؟؟

كلامك كله صح بس انتى شايفة انى التعليم ده هينفعنا فى الحياة العملية وبالله عليك انا افتكرت واحد صحبى كان بيقولى نص الكوباية الفاضية شكرا اوى لانك فكرتينى به

من ناحية هينفعنا او مش هينفعنا فدي مش هي القضيه

المهم المبدأ والمفروض اننا نتبع الصح

احنا لو بصينا حولينا هنلاقي غلط كتير لو كل واحد مننا يحاول يصلح الغلط ده ولو انه يمنع نفسه عنه هنبقي افضل من كده كتير

من رأي منكم منكرا فليغيره...........في نهاية الحديث بيقول وان لم يستطع فبقلبه وهذا اضعف الايمان

اولا الله يقوى ايمانك
ثانيا انتى بتفكرى جامد جدا لو كل الناس زيك الدنيا دى هتبقى حاجة تانية
انا كنت (فعل ماضى) بفكر زيك كده بالظبط بس تعبت اوى فى حاجات مش قادر اعملها بالمبدأ بتاعى الصحيح بحس انى بظلم نفسي اوى بس صح لو كل واحد منا قال كده الدنيا هتخرب ما هو لازم يبقى فى ناس صح وبالتالى يظلموا انفسهم علشان ماشيين صح وفى ناس تانية تكبر وتعلى على حساب الناس التانيين كلام محدش فاهم حاجة الصح ايه والغلط ايه الناس كلها بقت وحشة الا القليل طبعا ومعروفين تقدر تفرق بينهم بس الوحش كتير اوى ومغطيين على الكل خلاص الدنيا باظة ومش بايدينا حاجة نعملها بعد ما شاب ودوه الكتاب انا حصل معايا موقفين كنت اتمنى الموت ولا يحصلوا مع صحبى بتاع نص الكوباية على فكرة انا اتقلب عليا المواجع النهاردة افتكرت كل الحاجات اللى كنت عامل نفسي نسيها وده كله علشان ماشى على الحاط فى حالى بعمل الصح المفروض يحصل ومش بعمل اللى مش مفروض يتعمل سواء كان حرام عاب انا مسمحش لنفسى انى اعمل كده وفى الاخر طلعت انا .................مش لازم علشان كده خلاص تعبت من نفسي يا من الناس مش عارف الماشى صح ده حمار وطيب بياخد على ...... ويسكت واللى ماشى بطال هو ده الصح مش عارفين نعمل ايه الصح ولا الغلط





ان شاء الله ربنا هيهدينا لما فيه الخير لنا جميعا ولبلدنا مصر الحبيبة الغالية ان شاء الله
انا متعمد اكتب ان شاء الله علشان منساش وانا اتاكد منها وكلامك طلع صح لدرجة ان المفتى قال انها حرام شفتى بقى انتى خدتى ثواب اد ايه انا جاتلى فكرة حلوة ندور على اخطائنا وصححها وهناخد ثواب كبير بردك وبعد كده على اخطاء اصحابنا ودعيهم لتغيرها وناخد معاهم ثواب فكرة حلوة اتكلمت كلام كتير بس الواحد بيرتاح لما يتكلم وبينسي نفسه معلش قرأتى كتير ووجعت دماغك ولا كأنى قولت حاجة خالص
وربنا ينجحنا فى الامتحانات ويوفقنا

مينفعش تكون ماشي بمبدأ صح وتبقى النتيجة غلط، ممكن حصلك بعض المشاكل، لكن اكيد مش هتفضل على طول الخط، هو الموضوع شكله كبير والنقاش فيه محتاج وقت، ان شاء الله أول ما أرجع البيت هكمل معاكم

ماشى يا كبير واحنا متاكدين ان شاء الله الوصول لحل يرضى جميع الاطراف والصح هو اللى هيمشى

كلامك صح بس انا عندى طلب صغير جدا مش هتخسر حاجة لو عملته ممكن تشيل الصورة اللى انت وضعها دى وتضع واحدة غيرها معلش لو سمحت

شكرا جدا انت كدة تمام وربنا هيكرمك ان شاء الله

معلش لو كنت اتكلمت برخامة شوية بس هو ده الصح معلش هو المنتدى ده بتاع سنة اولى بس بس على ما اعتقد ان موقع شمساوى فى كل السنين ولو عايز المنتدى ده يشمل السنين كلها احنا مش معارضين

منتدى شمساوي
http://forum.shamsawy.net/

جزاك الله خيرا يا مازن

جزاك الله خيرا يا مازن

جزاك الله خيرا يا مازن

العفو

ربنا معاك يا باشا وبالتوفيق ان شاء الله

الحمد لله كملت بالاقتصاد رجوع الحالة الهستيرية تانى بس باختلاف شوية انى انا المرة دى ما افتكرتش حاجة خالص لحد ما قومت مشيت من الزهق لدرجة كنت هقوم اضرب المراقب التنح لو كنت قعدت 5 دقائق تانى على انا قعده كنت ارتكبت فى جريمة على اللى حصل منه

ليس بس كده، ده الاقتصاد جميل خالص، المهم انك تكون مليت ورقة الاجابة رسوم وكلام، وبإذن الله ربنا هيوفقك.

انا لسه امتحاني بكره ومذاكرتش غير شبترين وهما خمسه

ربنا يستر عشان انا خايفه بجد

طيب محدش يعرف انجزهم ازاي؟؟

بجد انا كنت بحب الاقتصاد وبقول ان شاء الله امتياز بس بعد لما خرجت من الامتحان مش تايقة حاجة اسمها اقتصاد
(عارفين الشعور لما يكون الواحد طالع عينوا ويحس انوا كل الى عاملو مجبش نتيجة)بجد شعور وحش اوى

ربنا هيسترها معانا كلنا بإذن الله

متقوليش كده

ان الله لا يضيع اجر من احسن عملا

صدق الله العظيم
انت كمان مش عاتق الارشيف